ՀՀ կրթության և գիտության նախարար Արմեն Աշոտյանն այսօր Երևանի թիվ 4 արհեստագործական ուսումնարանում մասնակցել է էլեկտրական սարքավորումների ժամանակակից կենտրոնի բացմանը: Ծրագիրն իրականացվել է փայտի, քարի և մետաղի մշակման ոլորտում էլեկտրական սարքավորումների առաջատար գերմանական Bosch ընկերության աջակցությամբ:

ՀՀ ԿԳ նախարարը, գնահատելով ուսումնարանի տեխնիկական հագեցվածությունը և կարևորելով մասնավոր հատվածի ներգրավումը կրթության կազմակերպման գործընթացում, ընդգծել է, որ կրթական համակարգը նոր տեխնոլոգիաների և ժամանակակից սարքավորումների հագեցվածության խնդիր ունի: «Էլեկտրական սարքավորումների այս կենտրոնը Մասնագիտական կրթության և ուսուցման ոլորտում առաջինն է, բայց հուսով ենք, որ վերջինը չի լինի: Այսպիսի կենտրոնների պահանջարկը մեծ է, քանի որ դրանք նպաստում են շուկային միտված մասնագիտությունների ուսուցման կազմակերպմանը: Կենտրոնը զինված է գերժամանակակից տեխնիկայով, և եթե երիտասարդը սովորում է աշխատել այդ գործիքներով, նա անպայման իր տեղը կգտնի աշխատաշուկայում, ինչը շատ կարևոր է»,- նշել է նախարարն ու հավելել, որ նախատեսվում է կազմակերպել դասավանդող վարպետների վերապատրաստում:

Նախարարը մասնավոր ընկերության ներկայացուցիչներին առաջարկել է շարունակել համագործակցությունը` ցանցը ընդլայնել և նման կենտրոններ ստեղծել նաև այլ ուսումնարաններում: Գերմանական  Bosch ընկերության ներկայացուցիչ Ն. Պրուիձեն գոհունակությամբ է խոսել ծրագրի մասին և նշել, որ սա տարածաշրջանում առաջին նման կենտրոնն է: Նախարարը շրջել է կենտրոնում, ծանոթացել սարքավորումների հնարավորություններին և նույնիսկ դրանցից մի քանիսը փորձարկել անձամբ:

(ըստ  www.edu.am-ի)